Karólína Lea Vilhjálmsdóttir hefur skrifað undir nýjan samning við Breiðablik og er nú samningsbundin til næstu þriggja ára.

Eftir að hafa komið frá FH síðasta vetur spilaði Karólína 27 leiki á sínu fyrsta ári með Blikum og skoraði í þeim 3 mörk.

Karólína er fædd árið 2001 en hefur engu að síður þriggja ára reynslu úr í meistaraflokki eftir að hafa spilað 30 leiki með FH áður en hún gekk í raðir okkar Blika. Hún hefur einnig verið í lykilhlutverki í yngri landsliðum Íslands, spilaði 26 leiki fyrir U17 ára landsliðið og á 8 leiki að baki fyrir U19 ára liðið. Í þessum landsleikjum hefur hún jafnframt skorað 12 mörk.

Karólína var fljót að láta til sín taka í Kópavoginum eftir komuna frá FH. Hún vann sér inn fast sæti í liðinu þegar leið á Íslandsmótið í sumar og var mikilvægur hlekkur í því að tryggja bæði Íslands- og bikarmeistaratitilinn.

Á dögunum var faðir hennar, Vilhjálmur Kári Haraldsson ráðinn þjálfari Augnabliks og 2. flokks kvenna.

Augnablik leikur í næst efstu deild á næstu leiktíð eftir sigur í 2. deildinni í sumar.

Vilhjálmur var leikmaður á árum áður með Breiðabliki auk þess að þjálfa lengi hjá félaginu.