Stórleikur El Clasico fer fram um helgina þegar Barcelona og Real Madrid eigast við í spænsku úrvalsdeildinni.
Um er að ræða tvö sigursælustu lið Spánar en leikur helgarinnar verður án Lionel Messi og Cristiano Ronaldo.
Ronaldo samdi við Juventus í sumar og Messi verður þá frá næstu vikurnar vegna meiðsla.
Luis Suarez, leikmaður Barcelona, var spurður út í fjarveru Ronaldo í dag en hann segir að lið Real hafi ekki bara snúist um einn leikmann.
,,Við vitum öll hvernig leikmaður Cristiano Ronaldo er en liðið er mikilvægara en einn leikmaður,“ sagði Suarez.
,,Þeir eru með aðra frábæra leikmenn sem geta gert gæfumuninn. Við verðum að spila okkar leik og ekki hugsa út í þeirra leikmenn.“
