Jose Mourinho, stjóri Manchester United, er á því máli að lið Juventus sé með betri leikmenn en hann er með á milli handanna hjá United.

Mourinho ræddi við blaðamenn í kvöld eftir 1-0 tap gegn Juventus í Meistaradeildinni á Old Trafford.

Mourinho talaði um nokkra leikmenn Juventus en var lítið í því að hrósa eigin leikmönnum.

,,Frammistaðan okkar? Við gerðum það sem við gátum. Þegar ég segi það þá segi ég að hitt liðið sé með ótrúleg gæði,“ sagði Mourinho.

,,Fólk talar um gæði og svo er horft á leikmenn eins og Cristiano Ronaldo, Paulo Dybala og Miralem Pjanic.“

,,Í toppliði þá verður þú að horfa á leikmenn eins og Georgio Chiellini og Leonardo Bonucci. Þegar Juventus er yfir þá er mjög erfitt að skora mark.“

,,Sóknarmennirnir okkar náðu sér ekki á strik en allir reyndu þar til í lokin.“