Wayne Rooney, leikmaður DC United, getur snúið aftur í ensku úrvalsdeildina og spilað fyrir Crystal Palace.
Þetta segir Roy Hodgson, stjóri Palace en hann er opinn fyrir því að taka á móti Rooney vilji hann snúa aftur.
Rooney yfirgaf Everton í sumar og hefur síðan þá staðið sig frábærlega með DC United í Bandaríkjunum.
,,Ég tel að hann hafi yfirgefið England of snemma. Hann býður ennþá upp á mikið,“ sagði Hodgson.
,,Hann er að standa sig frábærlega vel. DC United var á botninum þegar hann kom en síðan hann kom hefur hann verið stórkostlegur, ekki bara með því að skora mörk heldur mikilvæg mörk.“
,,Það er ekki hægt að efast um gæðin hans og hann sýnir það að hann gæti enn spilað í ensku úrvalsdeildinni.“
,,Kannski hafði hann ekki áhuga á að spila fyrir annað lið á Englandi eftir dvöl hjá Manchester United og svo Everton.“
,,Ég hefði elskað að fá hann til Palace en hann tók langan tíma í að taka ákvörðun. Hann hefur rætt það við fjölskyldu sína því hann er fjölskyldumaður.“
,,Allir góðir leikmenn sem vilja spila fyrir Palace eru alltaf velkomnir, við ættum að eiga efni á þeim.“