Það er erfiðara að spila gegn vængmanninum Wilfried Zaha en þeim Cristiano Ronaldo og Neymar.
Þetta segir Trent Alexander-Arnold, leikmaður Liverpool en hann hefur mætt mörgum stjörnum á stuttum ferli.
Alexander-Arnold þolir ekki að mæta Zaha, sérstaklega þegar hann mætir í leiki í sínu besta formi.
,,Þegar hann er að eiga sinn dag þá myndi ég segja að það sé erfiðast að mæta Zaha,“ sagði Alexander-Arnold.
,,Hann er svo mikill íþróttamaður. Þú nærð ekki boltanum af honum, það er erfitt að tækla hann, hann er hraður, teknískur, getur skorað mörk, lagt upp og unnið leiki.“
,,Neymar og Ronaldo eru mjög gáfaðir leikmenn en gegn okkur þá voru þeir ekki mikið með boltann.“
,,Zaha er augljóslega ekki í sama gæðaflokki og þeir en á hans degi er erfiðast að mæta honum.“