David Luiz, leikmaður Chelsea, segir að Manchester United hafi ekki viljað spila í gær er liðin áttust við á Stamford Bridge.

Leiknum lauk með 2-2 jafntefli en Luiz segir að heimamenn hafi verið mun sterkari og að United hafi aðeins notað skyndisóknir til að reyna að vinna.

,,Við reyndum að vinna leikinn alveg frá byrjun,“ sagði Luiz í samtali við heimasíðu Chelsea.

,,Við stjórnuðum leiknum, við vorum með boltann og reyndum að finna svæði til að skora mörk.“

,,Þeir komu hingað með ákveðið leikplan sem var bara að reyna að verjast og nota skyndisóknir.“

,,Í fyrri hálfleik var bara eitt lið sem reyndi að spila. Við hefðum getað gert betur með því að skora annað markið til aðdrepa leikinn.“

,,Það er þó aldrei auðvelt að vinna í úrvalsdeildinni, sérstaklega gegn stóru liði.“