Maurizio Sarri, stjóri Chelsea á Englandi, var ekki ánægður með einn meðlim í þjálfarateymi sínu í dag.
Sarri og félagar gerðu 2-2 jafntefli við Manchester United á Old Trafford en jöfnunarmark liðsins kom í blálokin.
Tæknilegur aðstoðarmaður Sarri, Marco Ianni, ákvað þá að fagna marki Chelsea fyrir framan Jose Mourinho, stjóra United.
Ianni missti sig algjörlega eftir markið en Sarri var ekki hrifinn af því sem aðstoðarmaður sinn bauð upp á og skipaði honum að biðjast afsökunar.
,,Eftir leikinn þá ræddi ég við Jose. Ég áttaði mig strax á því að við höfðum gert eitthvað rangt,“ sagði Sarri.
,,Ég ræddi svo við minn starfsmann og fór með hann til Mourinho til að biðjast afsökunar. Ég held að þetta mál sé búið.“