Bjarni Þór Viðarsson miðjumaður FH er enn að jafna sig eftir að hafa farið úr axlarlið í Lengjubikarnum.
Atvikið átti sér stað í febrúar og lamaðist hann tímabundið í handleggnum, vinstra megin.
Þegar atvikið kom upp þá vonaðist Bjarna til að missa aðeins af nokkrum leikjum í sumar, þegar uppi stóð þá var Bjarni frá allt sumarið.
,,Ég er bara ennþá að jafna mig,“ sagði Bjarni þegar 433.is sló á þráðinn til hans í dag.
,,Ég er bara áfram á Grensás í endurhæfingu, þetta gengur hægt en á eftir að ganga að lokum.“
Samningur Bjarna við FH er á enda á næstu vikum og óvíst er hvað hann gerir. ,,Höndin verður ekki góð fyrr en á nýju ári, ég sé bara þá hvað ég geri,“ sagði Bjarni sem lék átta leiki með FH sumarið 2017.
Möguleiki er á að Bjarni fari að þjálfa en FH-ingar hafa rætt slíkt við hann. ,,Það hefur verið rætt en ég hef ekkert hugað mikið út í það hingað til.“
Bjarni er þrítugur en hann kom heim úr atvinnumennsku árið 2015.