Hörður Björgvin Magnússon lék allan leikinn fyrir lið CSKA Moskvu í dag sem mætti Anzhi í rússnensku úrvalsdeildinni.

Hörður var partur af fimm manna varnarlínu CSKA í leiknum og stóð sig með prýði í 2-0 sigri á útivelli.

CSKA lyfti sér upp í þriðja sæti deildarinnar með sigri og er sex stigum á eftir toppliði Zenit.

Sverrir Ingi Ingason, Ragnar Sigurðsson og Björn Bergmann Sigurðarson spiluðu þá allir í 2-1 tapi Rostov gegn Lokomotiv Moskvu.

Sverrir skoraði eina mark Rostov í leiknum en hann jafnaði metin fyrir liðið í 1-1 á 27. mínútu.

Viðar Örn Kjartansson leikur einnig með Rostov en hann sat allan tímann á varamannabekknum.