Það er Jón Þórir Sveinsson sem mun þjálfa lið Fram í Inkasso-deild karla á næstu leiktíð.

Þetta staðfesti Fram í dag en Jón Þórir tekur við af Pedro Hipolito sem er nýr þjálfari ÍBV.

Jón þekkir vel til Fram en hann er leikjahæsti leikmaður í sögu félagsins og á að baki 312 leiki í Safamýrinni.

Tilkynning Fram:

Knattspyrnudeild FRAM og Jón Þórir Sveinsson hafa náð samkomulagi um að Jón taki við þjálfun karlaliðs FRAM í knattspyrnu. Samningurinn er til þriggja ára.

Jón þarf vart að kynna fyrir knattspyrnuáhugamönnum og stuðningsmönnum FRAM. Hann er einn leikjahæsti leikmaður í sögu félagsins með 312 leiki fyrir meistaraflokk FRAM. Jón lék sinn fyrsta leik fyrir FRAM árið 1983 og þann síðasta árið 1999. Hann varð þrisvar sinnum Íslandsmeistari og þrisvar sinnum bikarmeistari með félaginu á 9. áratugnum. Jón lék einnig um skeið með FH og Þrótti og á að baki leiki með öllum yngri landsliðum Íslands. Þá lék Jón eitt tímabil sem atvinnumaður í innanhúsknattspyrnu í bandarísku MISL deildinni með liði LaRaZa frá Monterrey Mexíkó.

Jón hefur mikla reynslu sem þjálfari, bæði sem þjálfari yngri flokka og sem aðstoðarþjálfari meistaraflokks. Hann hóf þjálfaraferilinn sem þjálfari 2. flokks FRAM árið 2001 og var aðstoðarþjálfari Kristins R. Jónssonar með meistaraflokk FRAM árið 2002. Jón var einnig aðstoðarþjálfari Þorvaldar Örlygssonar hjá FRAM árið 2009. Jón þjálfaði um árabil hjá Fylki, lengst af sem þjálfari 2. flokks og gegndi stöðu aðstoðarþjálfara meistaraflokks. Haustið 2017 kom Jón aftur til starfa hjá FRAM og hefur hann þjálfað 3. flokk karla hjá félaginu síðasta árið.