Andreas Pereira, leikmaður Manchester United, hefur tjáð sig aðeins um atvik sem kom upp fyrr á tímabilinu.
Paul Pogba birti þá myndband af sér og Pereira í stúkunni í hálfleik er United var 1-0 yfir gegn Derby í deildarbikarnum. Þeir skemmtu sér og hlógu.
Lélegt netsamband var á Old Trafford þetta kvöld og birtist myndband Pogba ekki fyrr en eftir leikinn sem United tapaði í vítakeppni.
Jose Mourinho, stjóri United, hélt að Pogba hefði birt myndbandið eftir tapið og var reiður á æfingasvæðinu daginn eftir.
,,Við vorum að vinna 1-0 í hálfleik þegar myndbandið var birt,“ sagði Pereira við blaðamenn.
,,Svo töpuðum við leiknum og fólk byrjaði að tala um að Pogba hafi birt þetta eftir á en hann birti þetta fyrir úrslitin.“
,,Stjórinn hélt að Pogba hefði birt myndbandið eftir leikinn, Þess vegna spurði hann út í málið.“
,,Það fylgdi þessu ákveðið skap og það var rætt um þetta alls staðar. Þetta tengist mér þó ekki neitt.“