Eysteinn Húni Hauksson mun þjálfa lið Keflavíkur á næsta tímabili, þetta staðfesti félagið í dag.
Eysteinn kláraði sumarið með Keflavík í Pepsi-deildinni en hann tók við af Guðlaugi Baldurssyni sem lét af störfum. Keflavík féll úr efstu deild.
Óvíst var hvort Eysteinn myndi halda áfram störfum en það hefur nú verið staðfest og verður Milan Stefán Jankovic honum til aðstoðar.
Tilkynning Keflavíkur:
Knattspyrnudeild Keflavíkur hefur gert samninga til þriggja ára við nýtt þjálfarateymi sem fær það hlutverk að byggja upp nýtt og sterkara Keflavíkurlið.
Eysteinn Húni Hauksson hefur verið ráðinn aðalþjálfari meistaraflokks karla. Í samstarfi við Eysteinn verður unnið markvisst að því að halda áfram að byggja upp unga og efnilega leikmenn Keflavíkur. Áhersla verður lögð á það að gefa ungu fólki tækifæri á að láta drauma sína rætast og bæta við titlum í safn sigursæls Keflavíkurliðs.
Til aðstoðar við uppbygginguna og sem aðstoðarþjálfari meistaraflokks karla hefur Knattpsyrnudeild Keflavíkur einnig gert samning við Milan Stefán Jankovic sem kemur frá Grindavík. Janko er einn örfárra þjálfara á Íslandi sem lokið hafa UEFA Pro þjálfaragráðu, sem er æðsta gráða sem hægt er að afla sér sem þjálfari. Hann var áður aðalþjálfari Keflavíkur frá árinu 2003 og kom liðinu í efstu deild á fyrsta ári og vann bikarmeistaratitil árið á eftir með ungan og efnilegan hóp leikmanna. Janko mun einbeita sér að því að byggja upp afrekshugsun, tæknilega getu og keppnishug leikmanna meistaraflokks Keflavíkur.
Þá hefur einnig verið gerður áframhaldandi samningur við Ómar Jóhannsson um markmannsþjálfun meistaraflokka karla og kvenna auk þess sem hann mun koma að þjálfun efnilegra yngri markmanna félagsins.