Erik Hamren, landsliðsþjálfari Íslands, þolir ekki að tapa en hann sá sína menn tapa 2-1 fyrir Sviss í kvöld.

Hamren hefur farið erfiðlega af stað með landsliðið en hann tók við af Heimi Hallgrímssyni í sumar.

Ísland náði þó í frábær úrslit í vináttuleik gegn Frökkum í síðustu viku en keppnisleikir hafa verið vandamál.

Hamren ræddi við Vísi.is eftir leik kvöldsins og viðurkennir það að hann sé alls ekki aðdáandi þess að tapa fótboltaleikjum.

„Ég er svekktur og einnig fyrir hönd leikmannanna sem lögðu svona mikið á sig. Við sköpuðum mörg færi en þetta gekk ekki,“ sagði Hamren við Vísi.

„Við byrjuðum leikinn ekki vel fyrstu tíu mínúturnar en eftir það spiluðum við vel í fyrri hálfleik. Fyrsta markið skiptir miklu máli og það sáum við einnig í Frakklandi.“

„Til að mynda ef Gylfi hefði skorað í fyrri hálfleik þá hefðum við fengið meiri kraft en þess í stað þá skora þeir í síðari hálfleiknum.“

„Já, en ég þoli ekki að tapa og ekki leikmennirnir heldur. Við töpuðum en við notum þetta í undirbúning fyrir undankeppni EM sem hefst í mars. Við tökum það góða því við verðum að muna að við vorum að spila gegn mjög sterkum liðum,“ bætti Hamren við er hann var spurður út í batnandi frammistöðu í síðustu leikjum.

Viðtalið má lesa í heild sinni á vef Vísis með því að smella hér.