Birkir Bjarnason, einn mikilvægasti leikmaður íslenska landsliðsins myndi kjósa það að spila á miðjunni frekar en á kantinum, ef hann fengi að ráða.
Birkir spilar yfirleitt á miðjunni hjá Aston Villa og var öflugur á miðsvæðinu gegn Frakklandi á fimmtudag.
,,Frammistaðan var mjög góð, frá fyrstu mínútu til loka nánast. Við ættum að vera mjög sáttir með það, að vera 2-0 yfir þegar fjórar mínútur eru eftir. Ekki gott að missa það niður, læra af því,“ sagi Birkir á fréttamannafundi í dag.
Hann segist vera sáttari á miðsvæðinu en eins og alltaf leggi hann sig fram, sama hvar hann spilar.
,,Persónulega líður mér betur út á miðjuna, skemmtilegra að spila þar. Mér hefur alltaf liðið vel úti á kantinum með landsliðinu. Hef leyst það mjög vel, ég spila þar sem þjálfarinn þarf á mér að halda. Gef alltaf mitt besta, ég spila með félagsliði á miðjunni og vill vera þar.“
Hann segir leikinn gegn Sviss í Þjóðadeildinni á morgun afar mikilvægan.
,,Mjög mikilvægur, við ætlum okkur að vera í efsta styrkleikaflokki þegar dregið er í riðlana. Við þurfum að ná í stig, við erum að verða komnir á það stig sem við vorum á áður. Við eigum góðan séns í að ná í stig.“