Eden Hazard, leikmaður Chelsea, vill vinna með Portúgalanum Jose Mourinho aftur á ferlinum.

Hazard og Mourinho unnu titilinn saman hjá Chelsea árið 2014 en tímabili síðar var Mourinho rekinn eftir hörmulega byrjun á leiktíðinni.

Hazard kennir Mourinho ekki um það gengi og viðurkennir að hann vilji vinna með honum aftur á ferlinum.

,,Á 12 árum þá hef ég aðeins átt eitt slæmt tímabil og það voru síðustu sex mánuðirnir undir Mourinho,“ sagði Hazard.

,,Það var að hluta til mér að kenna. Eftir titilinn þá báðum við Mourinho um smá auka frí og ég kom til baka í engu standi.“

,,Það er ekki alveg rétt að hann sé bara varnarsinnaður þjálfari. Hann er ekki eins ævintýragjarn og Pep Guardiola en þegar við unnum titilinn þá skoruðum við mörg mörk og spiluðum góða leiki.“

,,Síðasta tímabilið undir Mourinho var ekki skemmtilegt. Við unnum ekki leiki og vorum komnir í rútínu að æfa án þess að hafa gaman. Það var best fyrir alla að hann myndi fara.“

,,Ef ég er spurður að því í dag, hvaða stjóra ég væri til í að vinna með aftur þá myndi ég segja Mourinho.“