Eden Hazard, leikmaður Chelsea, hefur greint frá því hver eigi að vinna Ballon d’Or verðlaunin sem afhent verða í lok árs.
Hazard er sjálfur tilnefndur til verðlaunanna ásamt 29 öðrum leikmönnum en hann býst ekki við að vinna.
Hazard vonar að Luka Modric, leikmaður Real Madrid, vinni en undanfarin tíu ár hafa þeir Cristiano Ronaldo og Lionel Messi skipt verðlaununum á milli sín.
,,Ég held að ég muni ekki vinna verðlaunin og að mínu mati á Modric þau skilið,“ sagði Hazard.
,,Ég gæti nefnt þrjá eða fjóra leikmenn. Ég gæti nefnt Raphael Varane því hann vann líka mikið, ég gæti átt þau skilið líka, við skulum ekki ljúga!“
,,En í alvöru þá tel ég að Modric muni vinna. Það verða hans verðlaun fyrir magnað tímabil í Meistaradeildinni og keppni á HM í sumar.“