Byrjað er að grafa upp Kópavogsvöll en síðasti grasleikurinn hefur farið fram á vellinum um ókomna tíð.
Breiðablik mun á næstu leiktíð spila á gervigrasi á heimavelli sínum.
Þetta var ekki sú leið sem félagið vildi fara í fyrstu en bæjarstjórn tók þessa ákvörðun.
,,Aðdragandinn að þeirri ákvörðun að skipta yfir í gervigras er nokkuð langur – og kannski ekki það sem lagt var af stað með í upphafi. Stjórn knattspyrnudeildar Breiðabliks með Orra Hlöðversson í forsvari var með aðrar hugmyndir og lagði mikla vinnu í að finna lausn á aðstöðunni sem var löngu sprungin. Breiðablik er langstærsta knattspyrnufélag landsins með um 1.500 iðkendur. Þeir eru til sem halda því fram – og það hefur ekki verið hrakið – að Breiðablik sé fjölmennasta knattspyrnufélag í Evrópu hvað iðkendafjölda varðar. Staðreynd sem er afar merkileg. Til að Breiðablik gæti áfram sinnt sínu mikilvæga samfélagslega hlutverki vegna fjölgunar iðkenda voru uppi á borðum frá félaginu vandaðar tillögur um gervigrasvöll við hlið Fífunnar en á aðalvellinum skyldi áfram vera náttúrulegt gras,“ skrifar Hákon Gunnarsson á heimasíðu Blika.
Blikar bætast í hóp Stjörnunnar, Vals og Fylkis sem munu leika á gervigrasi á næstu leiktíð í Pepsi deild karla en óvíst er hvort Víkingur fari sömu leið fyrir næstu leiktíð.