Didier Deschamps, landsliðsþjálfari Frakklands, segir að fjölmiðlar séu að gera úlfalda úr mýflugu þegar kemur að sambandi Paul Pogba og Jose Mourinho.
Samband Pogba og Mourinho er sagt vera í molum og á sá fyrrnefndi að hafa beðið um sölu í janúar.
Deschamps hefur nú tjáð sig um málið og hann segir að þetta sé ekki eins alvarlegt og margir vilja meina.
,,Ég tel að það sé verið að ýkja þessar sögur. Kannski horfðuð þið ekki á 3-2 sigur á Newcastle um helgina en ég sá frábæran Paul Pogba,“ sagði Deschamps.
,,Ég held að Jose hafi séð það sama og ég. Eitthvað hefur gerst en eins og oft áður held ég að við séum að gera stórt mál úr einhverju sem er ekki stórmál.“
,,Þegar ég sé hvernig Paul hefur tekið á þessu máli hjá félaginu, það er hægt að segja að hann hafi gert allt mögulegt andlega og á vellinum til að hjálpa félaginu.“
,,Það eru engin vandamál hér með Paul. Ég vil ekki blanda mér í hans samband við þeirra stjóra.“