Atli Viðar Björnsson hefur ákveðið að leggja skóna á hilluna eftir 22 ár í meistaraflokki.
Hann lék fyrst um sinn með Dalvík, uppeldisfélagi sínu en hefur svo verið hjá FH í 18 ár.
Þessi magnaði sóknarmaður spilaði lítið í sumar og hefur ákveðið að snúa sér að nýjum verkefnum.
,,Rúmum 32 árum eftir fyrsta fótboltamótið, 22 árum eftir fyrsta meistaraflokksleikinn með Dalvík og eftir 18 ár hjá FH er skrýtið að vera allt í einu orðinn “fyrrverandi” fótboltamaður,“ skrfar Atli Viðar á Instagram síðu sína í dag.
,,Tel samt að nú sé ágætt að setja punkt og hefja nýjan kafla. Ég hef verið ótrúlega lánsamur að fá að taka þátt í allri velgengninni með FH undanfarin ár og geng þakklátur af velli.
,,Fótboltinn hefur verið stór hluti af lífi mínu alla mína tíð og verður það áfram, bara með allt öðrum hætti.“
Atli er 38 ára gamall en hann lék fjóra A-landsleiki á ferli sínum.