Paul Pogba, leikmaður Manchester United, gerði mistök með því að ræða leikplan liðsins gegn Wolves um helgina við fjölmiðla.
Þetta segir Jamie Redknapp, sparkspekingur Sky Sports en Pogba sagði að United ætti að ‘sækja, sækja og sækja’ þegar þeir væru á heimavelli.
Jose Mourinho, stjóri United, tók ekki vel í þessi ummæli og hefur ákveðið að taka fyrirliðabandið af Pogba.
Frakkinn var ekki með gegn Derby í kvöld en Redknapp telur að hann hafi þurft á hvíld að halda. Hann telur þó að þeir muni ekki vinna saman á næstu leiktíð.
,,Þetta hjálpar ekki til. Ég skil hann og ég er viss um að leikmenn tali um þetta í búningsklefanum. Ég tel þó ekki að þetta hjálpi. Ekki segja þetta við blöðin, segðu þetta við þjálfarann,“ sagði Redknapp.
,,Eftir að hann vann HM þá hefur hann ekki fengið hvíld. Það var það rétta í stöðunni að hvíla hann í kvöld.“
,,Það að hann sé ekki að spila í kvöld þýðir ekki neitt. Ég held þó að þeir verði ekki báðir þarna á næsta ári, kannski hvorugur þeirra.“