Það fór fram áhugaverð umræða í Dr. Football, hlaðvarpsþætti Hjörvars Hafliðasonar í dag þar sem Mikael Nikulásson og Kristján Óli Sigurðsson voru gestir hans.

Rætt var um það af hverju konur koma ekki í dómgæslu á Íslandi. Mikið er kallað eftir jafnrétti í knattspyrnuhreyfingunni og er allt á leið í þá átt.

Samt sem áður hafa konur ekki áhuga á að dæma leiki en mikil vöntun er á dómurum á Íslandi.

,,Af hverju nenna ekki stelpur að dæma fótboltaleiki? Stopp núna, hvetja allar ungar stelpur til að dæma sem eru ekki að fara að meika það í fótboltanum,“ sagði Hjörvar í þætti sínum.

Bent var á það að kvennalandsliðið fær sömu bónusa og karlalandsliðið og allt sé á leið í þá átt, nema dómgæslan.

,,Það eru allir komnir með jafn háa bónusa, 300 þúsund krónur fyrir að vinna Færeyjar 15-0. Guðni Bergsson reddaði því, varaformaðurinn sagði að þetta væri jafn góður fótbolti.“

,,Farið að dæma leikina, það er ekki hægt að vera bara í sófanum og fara í skemmtilegu störfin, Farið að dæma.“

,,Af hverju fara stelpur ekki á dómaranámskeið? Þetta er til skammar, það er Bríet (Bragadóttir) og svo er Rúna á línunni.“

Mikael Nikulásson, gestur Hjörvars í þættinum tók í sama streng.

,,Ef Guðrún Inga (Varaformaður KSÍ) ætlar að vera samkvæm sjálfi sér, að allt sé eins. Það er ekki hægt að segja að þetta eigi bara að vera eins þar sem það hentar, það gengur ekki upp.“