Marcus Rashford, leikmaður Manchester United, þarf að fara annað ef hann vill fá að spila í fremstu víglínu.

Þetta segir Alan Shearer, markahæsti leikmaður í sögu efstu deildar en hann horfði á Rashford spila með Englandi gegn Spáni um helgina.

Rashford skoraði eina mark Englands í 2-1 tapi en hann fékk fleiri færi til að skora.

Shearer segir að Rashford muni aldrei verða aðalmaðurinn hjá United þar sem hann er mikið notaður á vængnum.

,,Ég er mikill aðdáandi Marcus Rashford. Hann kemur sér í góðar stöður og hleypur fyrir aftan varnarmennina,” sagði Shearer.

,,Hann er alltaf ógnandi. Hann sýndi það með markinu sínu á Wembley hvað hans leikur snýst um.”

,,Hann klikkaði á tveimur færum til að tryggja Englandi stig í leiknum og það sýnir líka á hvaða stað hann er.”

,,Framherji sem fær reglulega að spila hefði alveg örugglega ekki klikkað á þessum færum.”

,,Ef hann vill verða þekktur fyrir það að vera frábær markaskorari þá gerist það ekki hjá Manchester United.”

,,Hann þyrfti að koma sér annað og fá loforð um það að hann yrði fremstur. Ég trúi því að hann geti orðið markaskorari.”