Morten Beck, leikmaður KR í Pepsi-deild karla, mun ekki spila meira með liðinu á árinu og gæti einnig misst af byrjun næsta tímabils en hann er með slitið krossband.
Þetta staðfesti Rúnar Kristinsson, þjálfari KR, í samtali við 433.is í dag en Morten verður frá keppni í 8-10 mánuði með slitið krossband og rifinn liðþófa.
Morten hefur átt fast sæti í liði KR undanfarin ár og hefur alls leikið 14 leiki fyrir liðið þetta sumar.
Ljóst er að þessar fréttir eru slæmar fyrir KR sem situr í fjórða sæti Pepsi-deildarinnar, fimm stigum frá Stjörnunni sem er í Evrópusæti.
Morten er samningsbundinn KR út þetta ár og er óvíst með framhaldið og hvort hann haldi áfram að spila hér á landi.