Framherjinn Nikola Kalinic hefur skrifað undir samning við lið Atletico Madrid á Spáni.
Þetta staðfesti félagið í dag en Kalinic gerir þriggja ára samning við Atletico og kemur frá Fiorentina.
Kalinic var alls í þrjú ár hjá Fiorentina en hann var lánaður til AC Milan á síðustu leiktíð þar sem hann skoraði sex deildarmörk.
Kalinic vakti athygli í sumar er hann var rekinn heim af HM eftir að hafa neitað að koma inná hjá króatíska landsliðinu gegn Nígeríu.
Kalinic er 30 ára gamall en hann var einnig á mála hjá Blackburn Rovers á Englandi á sínum tíma.