Það vakti athygli á síðustu leiktíð er Willian, leikmaður Chelsea, birti mynd af leikmannahóp liðsins sem vann FA bikarinn.
Allir leikmenn og þjálfarar Chelsea voru sjáanlegir á myndinni, nema Antonio Conte, þáverandi stjóri liðsins.
Búið var að hylja andlit og líkama Conte á myndinni sem Willian birti en ’emoji bikarar’ voru sjáanlegir í staðinn.
Willian var spurður út í þessa mynd í gær en hann segir að dóttir sín hafi óvart komist í símann!
,,Dóttir mín var að leika sér í símanum sem endaði með því að hún setti þessa emoji kalla yfir Conte,“ sagði Willian um atvikið.
Það verður að teljast líklegt að Willian sé ekki að segja sannleikann en hann hefur sjálfur viðurkennt það að samband hans og Conte hafi ekki verið gott.