Magni Grenivík lyfti sér úr botnsæti Inkasso-deildar karla í kvöld er liðið fékk Selfoss í heimsókn.

Magnamenn voru fyrir leikinn með níu stig á botninum en eftir 3-1 sigur í kvöld er Selfoss á botninum með 11 stig.

Fallbaráttan verður gríðarlega spennandi í sumar en aðeins fjögur stig skilja botnlið Selfoss og Leikni að sem situr í sjöunda sæti.

Víkingur Ólafsvík missteig sig þá í toppbaráttunni í kvöld er liðið fékk Hauka í heimsókn.

Víkingar lentu undir í leik kvöldsins er Renato Barros kom boltanum í netið fyrir Hauka í fyrri hálfleik.

Kwame Quee skoraði svo tvö mörk fyrir Víkinga í seinni hálfleik með stuttu millibili og staðan orðin 2-1 fyrir heimamönnum.

Það dugði þó ekki lengi en á 86. mínútu leiksins jafnaði Indriði Áki Þorláksson metin fyrir Hauka og tryggði liðinu dýrmætt stig.

Magni 3-1 Selfoss
1-0 Gunnar Örvar Stefánsson
2-0 Kristinn Þór Rósbergsson
2-1 Aron Ýmir Pétursson
3-1 Gunnar Örvar Stefánsson

Víkingur Ó. 2-2 Haukar
0-1 Renato Barros
1-1 Kwame Quee
2-1 Kwame Quee
2-2 Indriði Áki Þorláksson