Freyr Alexandersson er nýr aðstoðarþjálfari íslenska landsliðsins og tekur við því starfi af Helga Kolviðssyni.

Guðni Bergsson, formaður KSÍ, fór yfir ráðningu Freys á blaðamannafundi í dag þar sem Erik Hamren var einnig kynntur sem nýr landsliðsþjálfari.

Guðni segir að það sé mikilvægt að halda í ákveðin gildi en Freyr hefur undanfarin þrjú ár starfað hjá landsliðinu sem yfirnjósnari.

,,Með honum er góðkunningi okkar, Freyr Alexandersson sem verður Hamren til aðstoðar á grundvelli þessara hugmyndafræði sem við erum að vinna með,“ sagði Guðni.

,,Að sjá þessa tvo heiðursmenn vinna vel fyrir okkur og að reyna að tryggja þennan áframhaldandi árangur.“

,,Freyr hefur verið yfirnjósnari síðustu ár hjá landsliði karla og hefur starfað með liðinu í þrjú ár, hann þekkir vel til liðsins og er þar fyrir utan þjálfari kvennalandsliðsins og mun halda áfram sem slíkur en hans verkefni er að koma liðinu á HM og það mun ekki breytast.“

,,Hann þekkir vel til landsliðsins og sú tenging er eitthvað sem við viljum halda og halda í þessi gildi og hugmyndafræði sem við erum að vinna eftir.“

,,Niðurstaðan er að við erum með mjög góða blöndu tveggja frábærra þjálfara og ég held að þetta gefi okkur tækifæri á að viðhalda stöðugleika en á sama tíma koma nýir straummar með nýjum mönnum og nýjar áherslur sem er nærandi fyrir leikmenn.“