Guðni Bergsson, formaður KSÍ, hélt blaðamannafund í höfuðstöðvum KSÍ í dag þar sem Erik Hamren var kynntur til leiks sem nýr landsliðsþjálfari Íslands.

Erik tekur við af Heimi Hallgrímssyni sem sagði upp störfum nýlega eftir keppni á HM í Rússlandi.

Hamren hefur sterklega verið orðaður við stöðuna undanfarið og viðurkennir Guðni að ráðningin komi kannski ekki mörgum á óvart.

,,Við erum hér til að kynna til sögunnar Erik Hamren, næsta landsliðsþjálfara karla. Ég er ekki viss um að það komi á óvart enda ekki vel haldið leyndarmál. Það tókst ekki að halda þessu leyndu í þá daga sem við þurftum til að ganga frá þessu,“ sagði Guðni.

,,Niðurstaðan er ánægjuleg og það er gaman að kynna til leiks Erik sem næsta landsliðsþjálfara. Þetta var snart ferli síðan Heimir tilkynnti það að hann myndi ekki halda áfram, þrjár vikur eða svo.“

,,Ég vil nota tækifærið og þakka Heimi fyrir hans störf og að sama skapi Helga Kolviðs sem hætti sem aðstoðarþjálfari og Gumma Hreiðars sem hætti sem markmannsþjálfari, þeir geta gengið stoltir frá borði.“