Rúnar Kristinsson, þjálfari KR, segir að sínir menn hafi ekki átt skilið að tapa í kvöld í 15. umferð gegn Breiðablik.
Breiðablik vann KR 1-0 í Kópavogi í kvöld en leikurinn var ansi lokaður og var lítið um marktækifæri.
,,Það vantaði ekki mikið. Þetta var jafn leikur sem hefði átt að enda í jafntefli frekar en svona,“ sagði Rúnar við Stöð 2 Sport.
,,Þetta var mikil barátta en til að vinna þá þarftu að skapa eitthvað en við gerðum það ekki en Blikarnir ekki heldur. Þetta var lokaður taktískur leikur og þeir skora þetta eina mark.“
,,Við náðum ekki að færa boltann nógu vel á milli manna og ætluðum að gera þetta einfalt. Blikar náðu að hemja boltann betur en við hefðum getað spilað betur okkar á milli áður en við fórum í löngu boltana.“
Alexander Helgi Sigurðarson gerði eina mark Blika í kvöld með skoti fyrir utan teig en Beitir Ólafsson hefði mögulega gert betur.
,,Ég veit ekki hvort að hann hafi átt að gera betur, ég hef ekki séð þetta. Við vitum að þetta er hægrifótar leikmaður og það er lélegt að leyfa honum að skjóta þara.“
,,Beitir hreyfir sig í gagnstæða átt og mér er sagt að þetta hafi farið í gegnum klofið á varnarmanni en þetta var ekkert geggjað fast skot.“