Valsmönnum tókst ekki að komast í þægilega stöðu á toppi Pepsi-deildar karla er liðið mætti Fylki í Egilshöll í kvöld.
Ekkert mark var skorað í Egilshöll en Valsmenn eru nú einu stigi á undan Stjörnunni og Blikum er 14 umferðir eru búnar. Fylkir situr enn í fallsæti með 12 stig.
Hér má sjá það góða og slæma úr leiknum.
Plús:
Varnarleikur Fylkismanna í dag var frábær, færðu liðið vel og lokuðu öllum svæðum einnig mjög vel.
Aron Snær Friðriksson var virkilega öruggur í marki Fylkismanna, reyndi ekkert rosalega mikið á hann en hefur legið undir gagnrýni og fær því hrós fyrir að stíga upp gegn besta liði landsins.
Gengi Fylkismanna hefur ekki verið gott undanfarið en allt liðið á hrós skilið fyrir að loka dyrunum í dag. Hafa fengið á sig ótrúlega mörg mörk undanfarið.
Ólafur Ingi Skúlason er mættur heim í Fylki og það mun klárlega hjálpa liðinu. Átti flottan leik í dag.
Mínus:
Sendingar Valsmanna á 3 helming vallarins voru ekki sérstakar og skynjaði maður þreytu í nokkrum leikmönnum sem er vel skiljanlegt eftir þessa evróputörn.
Kantmenn Fylkismanna þeir Valdimar og Albert voru því miður bara slakir í dag og skemmdu mikið af álitlegum skyndisóknum.
Það hefði gert mikið fyrir bæði lið að fá þrjú stig í dag. Fylkir berst í fallbaráttu og Valsmenn eru í toppbaráttu. Nokkuð óvænt jafntefli.