Óli Stefán Flóventsson, þjálfari Grindavíkur, ætlaði að sækja þrjú stig í Vesturbæ í kvöld er liðið heimsótti KR í 14. umferð sumarsins.
Staðan var lengi markalaus á KR-velli en heimamenn skoruðu tvö mörk undir lokin og unnu 2-0 sigur.
,,Við ætluðum að sækja þrjú stig hingað en eftir hvernig leikurinn þróaðist þurftum við að verjast því sem við vorum með,“ sagði Óli Stefán við Stöð 2 Sport.
,,Við héldum þeim frá dauðafærum og það er pirrandi að sjá svona mörk sem við fáum á okkur, við höfðum algjörlega teiknað þetta upp. Óskar skoraði svona mark líka í síðasta leik og við vorum búnir að fara í gegnum þetta.“
,,Þetta er bara einn leikur af mörgum og við horfum þannig á þetta. Mig langaði í þrjú stig og er pínulítið pirraður því við fáum stöðu til að koma okkur í afgerandi færi en erum að klikka á síðustu sendingum.“
,,Þegar þeir finna taktinn verðum við svo kjarklausir og menn eru ekki nógu stórir til að takast á við svona verkefni. Við spáum aldrei í evrópubaráttu, í dag vildi ég bara fá þrjú stig.“
