Grindavík er komið í fimmta sæti Pepsi-deildar karla eftir góðan 3-0 sigur á Keflavík á heimavelli í kvöld.
Sigur Grindavíkur var í raun aldrei í hættu og var liðið með stjórn á leiknum nánast allan tímann.
Hér má sjá það góða og slæma úr leiknum.
Plús:
Grindavík spilaði bara mjög vel í leik kvöldsins. Voru mun sterkari aðilinn og var sigurinn verðskuldaður.
Einn sigur gerir mikið fyrir Grindavík sem fer nú upp fyrir FH í töflunni. Liðið er með 20 stig í fimmta sæti deildarinnar.
Elias Alexander Tamburini spilaði með Grindvíkingum í kvöld og virkar hann eins og flottur leikmaður. Stóð sig með prýði.
Það er auðvelt að missa haus er forystan er örugg en það gerðist ekki hjá Grindavík. Voru sannfærandi og skipulagðir.
Mínus:
Staða Keflvíkinga er bara orðin sorgleg. Þetta hlýtur að vera eitt versta lið Pepsi-deildarinnar í langan tíma.
Að vera með þrjú stig, án sigurs eftir 13 umferðir er bara met lélegt. Það er leiðinlegt að þurfa að strá salti í sarin en frammistaðan er óásættanleg.
Hvert er Keflavík að fara? Svona frammistaða skilar engu í Inkasso-deildinni. Þetta er ekki sama lið og tryggði sér upp á síðustu leiktíð.
