Ágúst Gylfason, þjálfari Breiðabliks, var gríðarlega ánægður með sína menn í kvöld eftir 4-1 sigur á FH í Kópavogi.
Blikar áttu frábæran kafla í síðari hálfleik og gerðu þrjú mörk á FH en staðan var lengi jöfn, 1-1.
,,Þetta er bara geggjað. Við sýndum frábæran karakter eftir að þeir jafna í 1-1. Við vorum fínir í fyrri og vorum 1-0 yfir en svo komast þeir inn í leikinn. Eftir að þeir jafna gerist eitthvað hjá liðinu og við spilum glimrandi og refsum þeim,“ sagði Ágúst við Stöð 2 Sport.
,,Við áttum frábærar skyndisóknir og ég er ánægður með vinnuframlagið í kvöld og gæðin í liðinu heilt yfir.“
,,Liðsheildin, við höfum unnið með hana og allir áttu frábæran dag í dag gegn frábæru FH liði. Við skorum fjögur mörk, ég bið ekki um meira.
,,Thomas Mikkelsen er flottur strákur og passar vel inn í liðsheildina hjá okkur. Það voru strákar að koma inn að gera frábæra hluti, þetta var sigur liðsheildarinnr.“
,,Við ætlum að halda áfram að vinna. FH kemur ofarlega á okkur og ætla að sækja og þá opnast glufur. Það verður allt annað upp á teningnum gegn Keflavík.“