Stjarnan vann öruggan sigur á eistnenska liðinu Nomme Kalju í kvöld í undankeppni Evrópudeildarinnar.

Stjarnan skoraði þrjú mörk gegn engu í Garðabænum í kvöld og er í góðri stöðu fyrir síðari leikinn í Eistlandi.

Hér má sjá það góða og slæma úr leiknum.

Plús:

Stjörnumenn spiluðu bara mjög vel í kvöld og áttu þennan sigur algjörlega skilið.

Þriggja marka forysta og hreint lak, þetta gefur Stjörnunni mikla von fyrir seinni leikinn sem fer fram í Eistlandi.

Hilmar Árni Halldórsson er svo gott vopn fyrir Stjörnumenn og gæti reynst mikilvægur ef liðið kemst áfram. Mark og stoðsending í kvöld.

Stemninginn í stúkunni virkilega góð í kvöld. Silfurskeiðin stendur ávallt fyrir sínu og þá sérstaklega í Evrópuleikjum.

Stjörnumenn þurfa ekki að óttast einhverja brjálaða stemningu í útileiknum. Völlur Kalju tekur 650 manns í sæti. Þeir hafa séð það stærra.

Mínus:

Það er eitthvað sem segir mér að fótboltinn í Eistlandi sé ekki upp á marga fiska. Þetta lið hafnaði í þriðja sæti deildarinnar á síðustu leiktíð.

Eistnenska liðið skapaði sér nánast ekkert í dag. Það var engin ógn í raun var bara eitt lið á vellinum og það voru Stjörnumenn.

Ég ætla að fara svo langt og segja að þetta Nomme Kalju lið sé bara lélegt. Þeir eru þó með nokkra eistnenska landsliðsmenn í sínum röðum.