Kristján Guðmundsson, þjálfari ÍBV, var ósáttur með hvernig sínir menn lokuðu leik kvöldsins er liðið mætti Sarpsborg í undankeppni Evrópudeildarinnar.
ÍBV var með ágætis tök á leiknum eftir fyrri hálfleikinn en fékk á sig fjögur í þeim síðari og er nú í slæmum málum fyrir seinni leikinn í Noregi.
,,Það er svekkelsi að henda þessu frá okkur eins og kjánar í lokin að fá á okkur þriðja og fjórða markið,“ sagði Kristján.
,,Ef við horfum á leikinn í heild og fyrri hálfleikinn þá vorum við fínir og sköpuðum okkur mjög góð færi, allavegana tvö. Það kennir okkur það að við verðum að nýta færin í svona leikjum.“
,,Við sáum að við vorum orðnir þreyttir í hálfleik og kannski hefðum við átt að núlla þetta niður en maður veit aldrei eftir á.“
,,Yvan er mjög mikilvægur í fjögurra manna vörninni hjá okkur og er einn af okkar bestu varnarmönnum og það var áfall að missa hann.“