Cristiano Ronaldo samdi í gær við lið Juventus á Ítalíu en hann gerði fjögurra ára samning.
Ronaldo er 33 ára gamall í dag en hann hefur átt magnaðan feril. Undanfarin níu ár lék hann með Real Madrid.
Ronaldo mun ekki spila fyrir annað lið en Juventus áður en ferlinum lýkur en þetta hefur umboðsmaður hans, Jorge Mendes, staðfest.
Ronaldo mun því ljúka ferlinum á Ítalíu en fer ekki til Bandaríkjanna eða Kína eins og margar stórstjörnur hafa gert.
,,Ég er mjög ánægður fyrir hönd Cristiano. Juventus verður hans síðasta félag og ég er ánægður með þessa ákvörðun,“ sagði Mendes.
,,Hann mun ljúka mögnuðum ferli sínum með þessu liði.“