Guðlaugur Baldursson er hættur sem þjálfari Keflavíkur í Pepsi-deild karla. Þetta staðfesti félagið í kvöld.
Í fréttatilkynningu Keflavíkur segir að Guðlaugur hafi óskað þess að láta af störfum.
Keflavík átti gott síðasta sumar í Inkasso-deild karla og undir stjórn Guðlaugs tryggði félagið sér sæti í efstu deild.
Sumarið 2018 hefur þó verið hræðilegt í Keflavík en liðið er með þrjú stig, án sigurs á botni Pepsi-deildarinnar eftir 11 umferðir.
Ekki er ljóst hver mun taka við liðinu endanlega en Eysteinn Hauksson mun stýra liðinu tímabundið.
Fréttatilkynning frá Knattspyrnudeild Keflavíkur
Guðlaugur Baldursson og stjórn knattspyrnudeildar Keflavíkur hafa komist að samkomulagi um að verða við ósk Guðlaugs um að láta af störfum sem yfirþjálfari knattspyrnudeildar. Hann hefur nú þegar tilkynnt samstarfsmönnum um ákvörðun sína, en hún er tekin með hagsmuni liðsins að leiðarljósi.
Guðlaugur hefur óskað eftir að láta af störfum strax og hefur stjórn félagsins falið Eysteini Haukssyni aðstoðarþjálfara að stýra liðinu tímabundið þar til að ákvörðun hefur verið tekin um framhaldið. Honum til aðstoðar verður Ómar Jóhannsson.
Stjórn knattspyrnudeildar virðir ákvörðun Guðlaugs og mun strax vinda sér að því að taka ákvörðun um framhald þjálfunnar liðsins. Engin ákvörðun hefur verið tekin um það enn sem komið er.
Guðlaugur hefur gengt mikilvægu hlutverki í þjálfun liðsins frá haustinu 2016 og hefur meðal annars átt stóran þátt í að koma liðinu aftur í efstu deild. Honum þökkuð góð störf og óskað velfarnaðar í framtíðinni.