KR vann sannfærandi sigur í Pepsi-deild karla í kvöld er liðið heimsótti Keflavík á Nettóvöllinn.

Þeir svarthvítu voru miklu sterkari í leik kvöldsins og unnu sannfærandi 4-0 útisigur en staðan var 0-2 eftir aðeins fimm mínútur.

Hér má sjá það góða og slæma úr leiknum.

Plús:

Það var enginn KR-ingur sem átti slakan leik í dag. Voru virkilega tilbúnir í verkefnið og voru mjög sprækir.

Fótboltinn sem KR spilaði var oft ótrúlega fallegur. Stutt, hratt spil sem virkaði gríðarlega vel, sérstaklega í fyrri hálfleik.

Kristinn Jónsson átti draumaleik í liði KR í kvöld. Maður leiksins án efa. Fór ekki út að ástæðulausu.

Mínus:

Keflvíkingar eiga ekkert erindi í Pepsi-deildina miðað við þessa frammistöðu. Ömurleg frá A til Ö.

Marc McAusland er fyrirliði Keflavíkur. Það eina sem ég sá hann gera í þessum leik var að hengja haus og öskra í grasið.

,,Sumarið fer í reynslubankann“ er hægt að segja um ungt lið Keflavíkur en það er bara ekki nóg, vill þetta lið ekki vera í efstu deild?

NÍU umferðir búnar og Keflavík er enn án sigurs. Þeir eru á leið niður, það er svoleiðis.

Þetta var SVO AUÐVELT fyrir KR, það er erfitt að lýsa því. Eins mikil einstefna og hægt er að bjóða upp á.

Keflavík lenti 2-0 undir eftir fimm mínútur. Það er ekkert sem afsakar það. Áhugaleysi og vonleysi. Ekkert sjálfstraust í þessu liði.