Valur styrkti stöðu sína á toppi Pepsi-deildar karla í kvöld er liðið heimsótti ÍBV til Eyja.
Aðeins eitt mark var gert á Hásteinsvelli en það gerði Kristinn Freyr Sigurðsson fyrir gestina í síðari hálfleik.
Hér má sjá það góða og slæma úr leiknum.
Plús:
Valsmenn hafa oft verið meira sannfærandi en í dag en fengu þrátt fyrir það þrjá punkta. Það er oft það sem meistarar gera.
Kristinn Freyr Sigurðsson er að komast í gang fyrir Íslandsmeistarana. Byrjaði erfiðlega en átti flottan leik í dag.
Spyrnur Kaj Leo í Bartolsstovu eru svo geggjaðar. Eyjamenn þurfa að nýta þetta vopn betur.
Mínus:
Greyið Rasmus Christiansen. Ég vil óska honum góðs bata. Fótbrotnaði í dag í fyrri hálfleik og var fluttur á sjúkrahús. Vonandi nær hann sér algjörlega af þessum meiðslum.
Leikurinn var engin frábær skemmtun. Vantaði betri færi í leikinn og í raun bara gæði oft á tíðum.
Eyjamenn eru í basli. Þurfa að fara að sækja fleiri stig ef þeir vilja losa sig við falldrauginn. Átta stig eftir níu umferðir er því miður ekki nógu gott. Heppnir að Keflvíkingar séu límdir við botninn.