Miðjumaðurinn efnilegi Alexander Helgi Sigurðsson hefur framlengt samning sinn við knattspyrnudeild Breiðabliks til loka keppnistímabilsins 2019.
Á sama tíma var hann lánaður tímabundið í Víking Ó og mun hann spila næsta leik með Ólafsvíkingunum í Inkasso-deildinni.
Alexander Helgi sem er 22 ára gamall hefur glímt við erfið meiðsli undanfarin ár.
Alexander Helgi fór ungur að árum til Az Alkmaar í Hollandi en meiðsli komu í veg fyrir að hann næði að láta til sín taka hjá félaginu. Hann snéri aftur til Blika árið 2016 en er fyrst núna að ná sér á strik. Alexander Helgi á að baki 18 leiki með yngri landsliðum Íslands og skoraði í þeim tvö mörk.
