Starfshópur sem ríkið og Reykjavíkurborg skipaði 11. janúar sl. um uppbyggingu Laugardalsvallar hefur nú skilað af sér niðurstöðum. Hópurinn fór yfir hugmyndir um þjóðarleikvang fyrir knattspyrnu, lagði mat á þær og gerði tillögur um mögulega uppbyggingu.
Þá hefur ríkisstjórn, borgarráð og stjórn KSÍ samþykkt að stofna undirbúningsfélag um mögulega framkvæmd. Undirbúningi fyrir ákvörðun um uppbyggingu Laugardalsvallar skal lokið fyrir lok árs 2018.
Nefndin skilaði af sér tveimur hugmyndum um hvernig útfærslurnar gætu orðið.
Annars vegar er um að ræða knattspyrnuvöll sem myndi taka 17 þúsund áhorfendur og myndi kosta á bilinu 8-11 milljarða. Um væri að ræða stúku allan hringinn.
Síðan er um að ræða 20 þúsund manna fjölnota leikvang sem væri með þaki yfir völlinn.
Búist er við að ákvörðun um hvort farið verði í framkvæmdir liggi fyrir í lok árs.
