Paul Merson, fyrrum leikmaður Arsenal telur að það geti komið í bakið á félaginu að losa sig við Arsene Wenger, stjóra liðsins í sumar.
Liðinu hefur ekki gengið vel á þessari leiktíð og situr nú í sjötta sæti ensku úrvalsdeildarinnar með 54 stig og er 13 stigum á eftir Tottenham í fjórða sæti deildarinnar.
Liðið tapaði fyrir Newcastle um helgina, 1-2 og gæti nú misst af Evrópusæti en Burnley, sem er í sjöunda sæti deildarinnar eru einungis tveimur stigum á eftir Arsenal.
Mikið hefur verið rætt og ritað um framtíð Wenger, sem á ár eftir af samningi sínum og telja flestir að hann muni yfirgefa félagið í sumar.
„Ég tel að ef hann verði látinn fara þá muni hann ekki hætta að þjálfa,“ sagði Merson.
„Hann mun fá annað starf því hann er ekki tilbúinn að hætta að þjálfa. Lífið hans snýst um fótbolta og hann er ekki hættur.“
„Það er vandamál Arsenal. Ef hann fer þá mun hann þjálfa áfram og það gæti komið í bakið á þeim því hann gæti gert eitthvað sérstakt hjá öðru liði, líkt og hann gerði hjá Arsenal á sínum tíma,“ sagði hann að lokum.