Dele Alli, miðjumaður Tottenham hefur komið Harry Kane, framherja liðsins til varnar.
Kane var talsvert gagnrýndur á dögunum fyrir mark sem hann fékk skráð á sig í 2-1 sigri liðsins gegn Stoke.
Markið var upphaflega skráð á Eriksen en Tottenham kærði það til markanefndar úrvalsdeildarinnar sem breytti úrskurði sínum og skráði markið á Kane.
„Harry Kane er ótrúlegur framherji og það má ekki gleymast að hann snerti boltann sem þýðir að hann á markið,“ sagði Alli.
„Allir framherjar eiga að eigna sér mörk, ef þeir snerta boltann. Ef þetta hefði verið ég sem hefði átt snertinguna þá hefði ég alltaf beðið um að fá markið skráð á mig.“
„Hann þarf að láta þessa umræðu sem vind um eyrun þjóta. Hann veit hversu góður hann er og það vita flestir sem fylgjast með fótbolta,“ sagði Alli að lokum.