Manchester United sá til þess að í dag varð Manchester City enskur meistari. United tók á móti West Brom á heimavelli, slakasta liði ensku úrvalsdeildarinnar.

City vann Tottenham í gær og með tapi United í dag er liðið orðið enskur meistari þegar fimm leikir eru eftir. United átti afar slakan leik í dag en í fyrri hálfleik hefði liðið átt að fá vítaspyrnu þegar brotið var á Ander Herrera.

Liðið spilaði hins vegar einn af sínum slakari leikjum í vetur og það kom í bakið á þeim á 73 mínútu leiksins þegar Jay Rodriguez tryggði sigur gestanna. Sigur City í deildinni því staðreynd en liðið hefur haft rosalega yfirburði.

,,Ég treysti á mína vinnu, ég hef unnið deildarkeppni átta sinnum,“ sagði Jose Mourinho um það hvort hann geti gert United að Englandsmeisturum á næstu leiktíð.

,,Ég hef unnið ensku deildina þrisvar, ekki fyrir tuttugu árum. Það var fyrir þremur árum, ég veit hvað þarf til að vinna. Ég trúi á sjálfan mig, þú vinnur ekki titla með heppni, það þarf stöðuleika á öllum sviðum. Andlegi hlutinn er mikilvægur, taka einn dag í einu.“