Manchester United sá til þess að í dag varð Manchester City enskur meistari. United tók á móti West Brom á heimavelli, slakasta liði ensku úrvalsdeildarinnar.
City vann Tottenham í gær og með tapi United í dag er liðið orðið enskur meistari þegar fimm leikir eru eftir. United átti afar slakan leik í dag en í fyrri hálfleik hefði liðið átt að fá vítaspyrnu þegar brotið var á Ander Herrera.
Liðið spilaði hins vegar einn af sínum slakari leikjum í vetur og það kom í bakið á þeim á 73 mínútu leiksins þegar Jay Rodriguez tryggði sigur gestanna. Sigur City í deildinni því staðreynd en liðið hefur haft rosalega yfirburði.
,,Ég hef unnið deildartitla átta sinnum og ég fór ekki til tunglsins eftir sigurinn á City,“ sagði Jose Mourinho stjóri United eftir leik.
,,Ég sá marga leikmenn fara til tunglsins því þeir unnu City, maður sá annað viðhorf miðað við síðustu vikur.“
,,City vann ekki deildina af því að við töpuðum, þeir unnu hana af því að þeir eru með fleiri stig en allir aðrir.“